Nest-Sotra United - pengar til rett tid

Nokre gonger kjem løysinga dettande ned i fanget på oss. Nest-Sotra United skal delta under Special Olympics til sommaren. Det kostar pengar, mange pengar. Så møtest ordførarane og der var pengane på plass. Bakgrunnen er at eit avvikla selskap hadde litt pengar som skulle tilbake til kommunane. No kunne desse pengane nyttast til eit svært godt føremål. Formannskapet i Øygarden er heilt samd i disponeringa av pengane og ynskjer alle i Nest-Sotra United lykke til i Aten.
150 tusen kommunale kroner til Nest-Sotra United

Noregs fotballandslag under Special Olympics til sommaren.

 Kommunane Fjell, Sund og Øygarden har løyvd 150 tusen kroner til fotballaget Nest-Sotra United som har fått det ærefulle oppdraget å representera Noreg under Special Olympics i Aten 20. juni - 4. juli.

Etter eit møte mellom ordførarane i Fjell, Sund og Øygarden, stadfestar Fjell-ordførar, Eli Årdal Berland, at kommunane vil støtta Nest-Sotra United med midlar for å gje laget ei oppleving for livet. Special Olympics i Aten er det største idrettsarrangementet i verda i 2011 med nesten 11 tusen deltakarar i 22 greiner. Denne organisasjonen arbeider særleg med å spreia idrett for menneske med utviklingshemming.

Alle skal medDet er Norges Fotballforbund som har valt ut fotballaget som skal representera Noreg. I utgangspunktet er det 15 plassar som vert finansiert av Special Olympics. Ordførar Eli Årdal Berland seier at denne opplevinga må heile laget få med seg.

- Difor vil vi gje laget ein god start i arbeidet med å finansiera ein tur der heile laget får vera med. Eg håpar at Nest-Sotra United får god respons på arbeidet med å finna sponsorar til denne store opplevinga for laget, seier ordføraren. Det same seier ordførar i Øygarden, Olav Martin Vik.

- Me er glade for å hjelpa til at laget kjem seg av garde, seier Vik.

Leiinga i Fjell kommune hadde møte med klubben på tysdag. Lagleiar i Nest-Sotra United, Tove Iren Vindenes, er overvelda over at dei tre kommunane støttar laget med 150 tusen kroner.

- Det er heilt eineståande at kommunane hjelper laget på denne måten. Dette sikrar dei verdiane laget byggjer på, seier Tove Iren Vindenes.