Eg ser at ein del les på gamle blogginnlegg om Stureterminalen og kommuneplanen. Nokre av innlegga er frå den tida eg var ordførar, fram til 2011. Kor relevante dei innlegga er i dag er vel eit stort spørsmål. Olja frå Johan Sverdrup-feltet (Johan Sverdrup) har gått til Mongstad (har lisensen blitt samde om) og kommuneplanen som var på veg mot ei avslutning i 2011 er framleis til handsaming i det kommunale systemet.
Det er synd for region Vest at Johan Sverdrup-olja ikkje kom til Øygarden. Eg har sakna det regionale engasjementet kring denne saka (det er mogeleg eg har oversett noko stor oppegonga rundt dette) og sikra regionen fleire bein å stå på i åra som kjem. Johan Sverdrup var eit slikt bein, med tanke på storleiken og langsiktige regionale ringverknadar. Det var viktigare for regionrådet å diskutera kommunestruktur enn å diskutera sikring av framtida for anlegg i regionen som har stor regional betydning. No er kommunestrukturprosjektet lagt på is (Les meir om det her).
Olje- og gassindustrien er viktig for kommunane her i vest og sjølv om det er naudsynt å sjå etter heilt andre bein å stå på i framtida, så er og vert denne industrien viktig i mange mange år. Det er og viktig å stikka fingeren i jorda og spørja etter korleis tilgongen er på arbeidskraft til anna framtidsretta næringsverksemd, førebels. Å utvikla fleire bein å stå på, samstundes som ein sikrar tilgong på arbeidskraft er eit krevjande prosjekt som krev langsiktig og målretta planlegging, saman med næringslivet.